தமிழக முதல்வர் பெயரில் ஏஐ டீப்ஃபேக் மோசடி: சிபிசிஐடி தீவிர விசாரணை

தமிழக முதலமைச்சரின் உருவம் மற்றும் குரலைப் பயன்படுத்தி செயற்கை நுண்ணறிவு தொழில்நுட்பத்தின் மூலம் உருவாக்கப்பட்ட போலியான டீப்ஃபேக் காணொளிகள் சமூக வலைதளங்களில் வேகமாகப் பரவி வருகின்றன. அரசு நிதியுதவி வழங்குவது போன்ற பிம்பத்தை உருவாக்கி பொதுமக்களை ஏமாற்றும் நோக்கத்தில் இந்த மோசடி காணொளிகள் பகிரப்படுவதாக சைபர் கிரைம் சிஐடி பிரிவு கண்டறிந்துள்ளது.

இந்த மோசடி காணொளிகள் பாகிஸ்தானில் இருந்து பகிரப்படுவதாகத் தகவல் வெளியாகியுள்ள நிலையில், இது குறித்து சிபிசிஐடி சைபர் கிரைம் பிரிவு வழக்குப் பதிவு செய்து தீவிர விசாரணையில் ஈடுபட்டுள்ளது. இத்தகைய குற்றச் செயல்களில் ஈடுபடுபவர்கள் மீது கடுமையான சட்ட நடவடிக்கை எடுக்கப்படும் என காவல்துறை எச்சரித்துள்ளது.

இந்தக் காணொளிகளில் குறிப்பிடப்பட்டுள்ள வாட்ஸ்அப் அல்லது தொலைபேசி எண்களைத் தொடர்பு கொள்ளவோ, அவற்றில் கேட்கப்படும் பணத்தை அனுப்பவோ வேண்டாம் என்று பொதுமக்களுக்குக் காவல் துறை அறிவுறுத்தியுள்ளது. தொழில்நுட்பத்தைப் பயன்படுத்தி செய்யப்படும் இத்தகைய ஏமாற்று வேலைகளைக் கண்டு பொதுமக்கள் விழிப்புடன் இருக்குமாறும், இத்தகைய போலியான காணொளிகளை நம்ப வேண்டாம் என்றும் காவல்துறை தரப்பில் வலியுறுத்தப்பட்டுள்ளது.