என்.எல்.சி ஒப்பந்தத் தொழிலாளர்கள் பணி நீக்கம்: தமிழக அரசு தலையிட அன்புமணி ராமதாஸ் கோரிக்கை

நெய்வேலி என்.எல்.சி நிறுவனத்தின் நிலக்கரி சுரங்கங்களில் பணியாற்றி வந்த ஒப்பந்த மற்றும் தற்காலிகத் தொழிலாளர்கள் பணி நீக்கம் செய்யப்பட்டுள்ள விவகாரத்தில், தமிழக அரசு உடனடியாகத் தலையிட்டு நடவடிக்கை எடுக்க வேண்டும் என்று பாமக தலைவர் அன்புமணி ராமதாஸ் வலியுறுத்தியுள்ளார்.

என்.எல்.சி நிறுவனத்தின் 1, 1ஏ மற்றும் 2 ஆகிய சுரங்கங்களில் பணியாற்றி வந்த 347 ஒப்பந்தத் தொழிலாளர்கள் கடந்த ஆகஸ்ட் 31-ஆம் தேதியுடன் பணி நீக்கம் செய்யப்பட்டுள்ளனர். இதுமட்டுமல்லாமல், மேலும் 713 தொழிலாளர்களைப் பணியிலிருந்து நீக்குவதற்கு என்.எல்.சி நிர்வாகம் திட்டமிட்டு வருவதாகவும் தகவல்கள் தெரிவிக்கின்றன.

மொத்தம் 1,060 தமிழர்களின் வாழ்வாதாரம் பாதிக்கப்படும் இந்த விவகாரத்தில், என்.எல்.சி நிறுவனம் மேற்கொண்டு வரும் அத்துமீறல்களை வேடிக்கை பார்க்காமல் அரசு தடுத்து நிறுத்த வேண்டும் என்று அன்புமணி ராமதாஸ் தனது எக்ஸ் தளத்தில் பதிவிட்டுள்ளார். பணி நீக்கம் செய்யப்பட்டவர்களுக்கு மீண்டும் பணி வழங்கவும், அனைத்துத் தொழிலாளர்களின் பணிப் பாதுகாப்பை உறுதி செய்யவும் அவர் அரசுக்குக் கோரிக்கை விடுத்துள்ளார்.